Türkiyədə prezident Rəcəb Tayyip Ərdoğanın iştirakı ilə "Milyonlarla Nəfəs, Terrora Qarşı Tək Səs" mitinqi keçirilib.

APA TV-nin məlumatına görə, çıxışına şair Necip Fazilin "İstanbul" şeiri ilə başlayan Ərdoğan HDP-nin PKK terror təşkilatı ilə bağlı sərgilədiyi mövqeyi sərt şəkildə tənqid edib: "Yalan üstündə inşa etdiyiniz bir dünyanız var. Cəsədlərinizi özünüzə aid parçalara büküb, "bayrağımıza hücum var" deyirsiniz. Amma siz zaman-zaman müqəddəs bayrağımıza əl uzatdınız, onu endirməyə çalışdınız. İndi isə bəzi xain türklərin hesabına ayaqda qalmağa çalışırsınız. Bu işlər sazla-cazla olmaz".

Ərdoğanın çıxışı zamanı "Parlamentdə PKK İstəmirik" şüarları səsləndirilib.

Türkiyə prezidenti çıxışına davam edərək bildirib ki, ölkədə terrora dəstək verənlər bu coğrafiyada nəyə görə olduğunu bilməyənlərdir. O, qeyd edib ki, Türkiyədə etniklər heç bir zaman təhqir olunmayıblar, hər zaman sülh və qardaşlıq çərçivəsində yaşayıblar.

Çıxışı zamanı "Mənim ölkəmdə etnik yox, terror problemi var" deyən Ərdoğan terrora qarşı bir araya gələn İstanbul sakinlərinə öz təşəkkürünü bildirib. O, terrorla mübarizə əməliyyatları zamanı şəhid olanlara Allahdan rəhmət diləyib.