Çin Kommunist Partiyasının Mərkəzi Komitəsinin baş holdinqinə daxil olan əsas nəşr orqanı - "Jenmin jibao" qəzetinə aid "Jenminvan" internet-portalının korrupsiyada şübhəli bilinən top-menecerləri işdən çıxarılıb.

AZƏRTAC TASS informasiya agentliyinə istinadla xəbər verir ki, "Jenminvan" kompaniyasının prezidenti Lyao Huna və direktorlar şurasının üzvü, vitse-prezident Çen Çjisya artıq tutduqları vəzifədən azad ediliblər. Kompaniyanın yeni prezidenti isə Nyu İbin təyin olunub.

Çinin ən iri KİV-lərindən birinin rəhbərliyi ətrafında cərəyan edən korrupsiya qalmaqalı keçən həftə başlayıb. Henan əyalətinin xalq prokurorluğu avqustun 27-də rüşvətxorluq şübhəsi ilə Lyao Huna və Çen Çjisya barədə cinayət işi açıb və ilkin tədqiqatlara başlayıb.

1997-ci ilin yanvar ayında fəaliyyətə başlayan "Jenminvan" dünyanın ən iri internet-portallarından birinə çevrilib. 2012-ci ilin aprel ayında kompaniya aksiyalarını Şanxay fond birjasında yerləşdirib.

Xatırladaq ki, Çində korrupsiya ilə mübarizə kampaniyası 2012-2013-cü illərdə ölkədə Çin Xalq Respublikasının sədri, Çin Kommunist Partiyası Mərkəzi Komitəsinin baş katibi Si Tszinpin başda olmaqla rəhbərlərin "beşinci nəslinin" hakimiyyətə gəlməsindən sonra geniş miqyas alıb.