Sentyabrın 4-dən 6-dək İstanbulda beynəlxalq çağdaş və modern sənət dünyasını özündə birləşdirən "Artinternational" sərgisi nümayiş olunacaq.

AZƏRTAC Anadolu agentliyinə istinadla xəbər verir ki, 27 ölkədən 400-dən çox sənətkarın qatılacağı beynəlxalq sərgidə Andy Varhol, Joan Miro ve Banksy kimi dünya şöhrətli rəssamların əsərləri də sərgilənəcək.

İstanbulun Haliç Konfrans Mərkəzində reallaşacaq sərgidə İngiltərənin dünyaca məşhur rəssamları olan David Hockney, və Grayson Perrynin əsərləri ilə yanaşı, Çinin "Görünməz adam" ləqəbli görkəmli fırça ustası Liu Bolin də əsərləri nümayiş olunacaq.

Qeyd edək ki, artıq üçüncü dəfə keçirilən sərgini keçən il 20 mindən artıq insan ziyarət edib və sərgidən 26 milyon 500 min gəlir əldə olunub.