Türkiyədə PKK terrorçularına qarşı əməliyyatlar davam edir. APA TV-nin məlumatına görə, təhlükəsizlik qüvvələrinin Diyarbəkirin Silvan qəsəbəsində yollarda xəndəklər qazaraq barrikadalar quran terrorçulara qarşı əməliyyatın havadan çəkilmiş görüntüləri yayımlanıb.

Görüntülərdə terrorçuların evlərin damında gizlənərək təhlükəsizlik qüvvələrinə iriçaplı silahlardan atəş açması kadrları yer alıb. Kadrlarda üzü maskalı terrorçuların atışmadan sonra dar küçələrə qaçaraq gizləndiyi görünür. Qeyd edək ki, 6 saat davam edən və 700 təhlükəsizlik qüvvəsi əməkdaşının qatıldığı əməliyyat zamanı 4 terrorçu öldürülüb. Terrorçulardan 3 ov tüfəngi, 9 əldəqayırma bomba, 8 minaatan, qaz balonunun içərisinə yerləşdirilmiş partlayıcı qurğu, çoxlu sayda sursat götürülüb. Təhlükəsizlik qüvvələri qəsəbə yollarında qazılmış 11 xəndəyi doldurub, 20 barrikadanı dağıdıb.