Misir Süveyş kanalının yeni məcrasının tikintisinin başa çatması ilə əlaqədar poçt markasının buraxılışına başlayıb. Kanalın açılış mərasimi avqustun 6-da keçiriləcək.

Yerli KİV-lərin yaydığı xəbərə görə, markada bu su arteriyasının köhnə və yeni məcrası, qarşı-qarşıya üzən iki yük gəmisi təsvir olunub. Yeni və köhnə məcralar arasında qədim Misirin rəmzi - yuxarısı “həyat açarı” adlanan halqa formasında olan xaçşəkilli “Anx” təsvir edilib. Markada Misirin əsas rəmzi – Cizədəki böyük ehramlar da təsvir olunub.

Süveyş kanalının 72 kilometrlik yeni məcrasının təntənəli açılışı Misir Prezidenti Əbdülfəttah əs-Sisinin iştirakı ilə avqustun 6-da olacaq. Açılış mərasimində Baş nazirin müavini Abid Şərifovun başçılığı ilə Azərbaycan nümayəndə heyəti iştirak edəcək.