Çex Respublikasının rəsmiləri bazar ertəsi günü Rusiya səfirliyindən diplomatik nümayəndəliyin əhatə etdiyi ümumi ərazinin yarım hektarının geri qaytarılmasını tələb ediblər. Söhbət 1968-ci ilə qədər Stromovka Parkının bir hissəsi olan ərazidən gedir.
Moderator.az xəbər verir ki, bu barədə Praqa-7 rayonunun bələdiyyə başçısı Yan Çijinski öz “Twitter” səhifəində məlumat verib.
O bildirib ki, bu barədə müraciət artıq Çexiya hökumətinə göndərilib.
Çex televiziyası bunun, təxminən, yarım hektar ərazi olduğunu dəqiqləşdirib. Şəhər rəhbərliyi bu ərazidə Sovet hərbi hissələrindən birinin düşərgəsinin yerləşdirildiyi 1968-ci ilin avqustundan əvvəl olduğu kimi, orada gül kolları və ağac əkmək niyyətindədir. Bu qərar Rusiya səfirliyinin 18 əməkdaşının respublikadan qovulmasından sonra Rusiya-Çex münasibətlərinin kəskin şəkildə pisləşməsii fonunda qəbul edilib.