Bakıda 15 nəfərin faciəli ölümünə səbəb olan çoxmərtəbəli binadakı yanğın səbəbindən “Qarabağ” komandasının azarkeş qrupu “İmarət” sabah Premyer Liqada “İnter”lə keçiriləcək matçda 90 dəqiqə sükut edəcək.

Bu haqda Qol.Az saytına fan-klubdan məlumat verilib.

Fan-klubun öz üzvlərinə ünvanladığı müraciətdə deyilir: “22 may 2015-ci il tarixdə, saat 20.00-da "İnter Arena" stadionunda “İnter”lə keçirəcəyimiz matçda "İmarət Tayfa” qapının arxasındakı tribunaya qara, yazısız parça asıb 90 dəqiqə səssiz oturacaq. Hamı qara geyinsin!”

Fan-klub bildirib ki, “Qarabağ”ın əvvəlki oyunlarından fərqli olaraq, bu dəfə azarkeşlər bəstə oxumayacaqlar.

“İmarət” həmçinin Bakıdakı faciəyə görə “Qarabağ”ın çempionluq qutlamalarını təxirə salıb.