"Mançester Yunayted" "Real"da icarə əsasında oynayan futbolçusu Xavyer Hernandeslə yolları ayırmağı planlaşdırır.

Qol.Az-ın Britaniya mətbuatına istinadən yaydığı xəbərə görə, "MY" 26 yaşlı hücumçunu satışa çıxarıb.

Məlumatda bildirilir ki, baş məşqçi Lui van Qalın heyətdə görmək istəmədiyi meksikalı oyunçu üçün hər hansı klub 7 milyon funt-sterlinq ödəyəcəyi təqdirdə, "MY" X.Hernandesi satacaq.

Qeyd edək ki, J.Hernandes bu mövsümün sonuna kimi "Real"da icarə əsasında çıxış edəcək. "Atletiko"ya qarşı Çempionlar Liqasının 1/4 finalında keçirilən cavab matçında qələbə qolunu vurmasına baxmayaraq, Madrid klubu da X.Hernandesi yeni müqavilə imzalamaq niyyətində deyil.

Əlavə edək ki, X.Hernandeslə "Vest Hem, "Sauthemton", Valensiya" və Moskva "Dinamo"sunun maraqlandığı iddia edilir.