"Çətin və maraqlı oyun keçdi. Daha çox qol vurmaq üçün şansımız oldu. Amma bunların cəmi birindən yararlana bildik".

Bu sözləri Qol.Az-a "Qarabağ"ın futbolusu Leroy Corc Azərbaycan kubokunun yarımfinal mərhələsində "Simurq"a 1:0 hesabı ilə qalib gəldikləri ilk görüşdən sonra deyib.

Hollandiyalı oyunçu bildirib ki, meydana sonradan daxil olmasına baxmayaraq komandasının uğur qazanması üçün əlindən gələni edib:

“Simurq” yaxşı rəqibdir. Düzgün mübarizə aparmağı bacaran komandadır. Sevinirəm ki, qalib gələn tərəf biz olduq".

L.Corcun sözlərinə görə, cavab qarşılaşmasında da onları çətin oyun gözləyir:

"Üstünlüyümüzü qorumaq üçün əlimizdən gələni edəcəyik. Amma bu, asan olmayacaq. Çünki bizim “Simurq”la həm kubokun cavab qarşılaşmasında, həm də çempionatda ardıcıl matçlarımız var. İndidən heç nə demək olmaz. Amma hər iki kuboku qazanmaq istəyirik. Çempion olma üçün də imkanlarımız çoxdur. Buna baxmayaraq bu barədə danışmaq hələ tezdir. Son oyuna kimi bizim çətin yolumuz var".