2018-ci il dünya çempionatının seçmə qrup mərhələsində Şimali İrlandiya yığmasının qonağı olacaq Azərbaycan millisi bu gün oyunun keçiriləcəyi Belfast şəhərinə yola düşüb.

"Report"un məlumatına görə, millini aparan təyyarə Bakı vaxtı ilə saat 15:00-da Heydər Əliyev adına Beynəlxalq Hava Limanından havaya qalxıb.

Futbolçularla yanaşı AFFA-nın baş katibi Elxan Məmmədov və qurumun digər rəsmi şəxsləri, Məşqçilər Komitəsinin sədri Vaqif Sadıqov, Bakı Olimpiya Stadionunun direktoru Cavid Qarayev və bir qrup jurnalist oyunu izləmək üçün adı çəkilən şəhərə gedib. Hava limanında olan şəxslər milli komandanın üzvlərinə uğurlar arzu edib və onlara inandıqlarını bildirib.

Çarter reysi ilə yola düşən millinin təxminən 9 saatdan sonra Belfatsa çatması gözlənilir.

Qeyd edək ki, Şimali İrlandiya - Azərbaycan oyunu noyabrın 11-də keçiriləcək.