AFFA-nın danışılmış oyunların araşdırılması ilə bağlı komissiyası Azərbaycan çempionatının bəzi oyunlardakı şübhəli məqamlarla bağlı araşdırmalara başlayıb. "Report"un müxtəlif klublardan əldə etdiyi məlumata görə, araşdırmalar, xüsusən, I Divizion qarşılaşmalarını əhavə edir.

Komissiya mətbuatda mövzu ilə əlaqədar vaxtaşırı informasiyaların dərcini də nəzərə alaraq hərəkətə keçib.

Öz növbəsində AFFA-nın İnformasiya və İctimaiyyətlə Əlaqələr Departamentinin rəhbəri Mikayıl Nərimanoğlu sorğuya cavab olaraq, xəbəri nə təsdiq, nə də təkzib edib. Qurum rəsmisi proses barədə konkret məlumat verməsə də, bununla bağlı mütəmadi işlərin görüldüyünü bildirib. Onun sözlərinə görə, proses UEFA ilə qarşılıqlı əməkdaşlıq çərçivəsində həyata keçirilir.

M.Nərimanoğlu, həmçinin xatırladıb ki, AFFA-nın İcraiyyə Komitəsinin avqustun 29-da keçirilmiş iclasında "Danışılmış oyunlar və oyun nəticələrinin manipulyasiyası” ilə bağlı Bəyannamə qəbul olunub. Həmin Bəyannaməyə əsasən, peşəkar futbolla bu və ya digər şəkildə məşğul olan hər bir şəxs sənədi imzalamaqla üzərinə müvafiq öhdəlik götürür: "Bəyannamə AFFA tərəfindən müvafiq futbol strukturlarına təqdim olunub. Eyni zamanda, UEFA Avropa futbolunun sağlam gələcəyini təmin etmək, şəffaf rəqabəti qorumaq, futbolda idman nəticələrinin manipulyasiyası və razılaşdırılmış oyunlar kimi neqativ halları aradan qaldırmaq üçün mütəmadi tədbirlər həyata keçirir”.