Azərbaycanlı K-1 döyüşçüsü Zabit Səmədov Çeçenistanın ilk prezidenti Əhməd-Hacı Kadırovun xatirəsinə həsr olunmuş peşəkar kikboksinq turnirində iştirak edib.

Qaziler.az xəbər verir ki, Qroznıda keçirilən döyüşdə Zabit Səmədov WBC Muay Thai versiyası üzrə dünya çempionu titulu uğrunda rumıniyalı döyüşçü Katalin Moroşanu ilə qarşılaşıb.

Döyüş K.Moroşanunun hücumları ilə başlasa da, Zabit gözlənilmədən rəqibinin sinəsinə güclü diz zərbəsi endirərək onu nakauta salıb.

Bununla da, azərbaycanlı K-1 döyüşçüsü dünya çempionu titulunu qazanıb.

Qeyd edək ki, Z.Səmədovun 120-yə yaxın azarkeşi Bakıdan iki avtobusla Qroznıya yollanıb və zalda idmançımıza dəstək olub.