UEFA-ya üzv ölkələrin milli komandalarının ən yaxşı bombardirlərinin siyahısı açıqlanıb. Qol.Az-ın qurumun rəsmi saytına istinadən verdiyi məlumata görə, siyahıda 60 futbolçu yer alıb.

UEFA-ya yeni üzv olan Cəbəllütariq yığmasının üç futbolçusu Roy Çipolina, Ceyk Qoslinq və Kayl Kaskiaro hərəyə bir qol vurmaqla ölkələrinin ən məhsuldar futbolçuları statusunu daşıyırlar.

Belçika, Şotlandiya, Rumıniya və Danimarka yığmalarının isə iki futbolçusu eyni sayda qol vurub. Siyahıya 84 qolla Macarıstan millisinin əfsanəvi hücumçusu Ferens Puşkaş başçılıq edir. Almaniya yığmasının sabiq hücumçusu Miroslav Kloze isə 71 qolla ikincidir.

Azərbaycan UEFA-nın bombardirlər siyahısında bir futbolçu ilə təmsil olunur. Millimizin sabiq hücumçusu Qurban Qurbanov da siyahıda yer alıb. O, yığmamızın heyətində 14 dəfə rəqib qapılarına yol tapıb.

Qeyd edək ki, hazırda "Qarabağ" klubunu çalışdıran Qurban Qurbanov 1992-2005-ci illərdə yığmamızın şərəfini qoruyub.