Bu gecə keçirilən oyunla “Los Angeles Lakers” formasını sonuncu dəfə geyinən əfsanəvi basketbolçu Kobe Bryant 60 xal toplayaraq “Staples Center” arenasına toplaşan minlərlə fanata möhtəşəm anlar yaşadıb.

Lent.az xəbər verir ki, dünya basketbolunun əfsanələrindən olan Kobe Bryant 20 ildir davam edən “Los Angeles Lakers” karyerasına “Utah Jazz”la oyunla nöqtə qoyub. Oyun Kobenin komandasının 101 – 96 hesablı qələbəsi ilə yekunlaşıb. “Black Mamba” ləqəbli əfsanəvi oyunçu matç bitər-bitməz azarkeşlər üçün vida çıxışı edib: “20 ilin necə keçdiyinə inana bilmirəm. Qatı “Lakers” azarkeşi kimi yetişdirildim. Bu komandaya qatılmağı və 20 il burada oynamağı həyatımda heç bir şeyə dəyişdirmərəm. Xəyallarım gerçəkləşdi. Bu dövrdə mənə dəstək verən hər kəsə təşəkkür edirəm. Mənə verdiyiniz motivasiya üçün bütün fanatlara minnətdaram. Hər zaman qəlbimdə olacaqsınız. Komanda yoldaşlarıma mənə verdikləri dəstək, ailəmə də göstərdiyi fədakarlıq üçün çox təşəkkür edirəm”.

Əfsanəvi basketbolçu çıxışının sonunda deyib: “20 ildir hər kəs mənə “pas ver” deyə bağırırdı. Amma bu axşam bütün komanda yoldaşlarım “qəti pas vermə” dedilər. Hamısına çox təşəkkür edirəm. Onların sayəsində gözəl bir vidaya imza atmış oldum. “Mamba” getdi…”