Latviyanın paytaxtı Riqada güləş üzrə Avropa Çempionatında idmançımız Hacı Əliyev bürünc medal qazanıb.

Qaziler.az bildirir ki, Azərbaycan Güləş Federasiyasından "Xəzər Xəbər"ə verilən məlumata görə, 61 kq-da mübarizə aparan ikiqat dünya çempionu Hacı Əliyev rəqiblərinə bir xal belə vermədən əvvəlcə Litvadan Sarinas Jurcisi, ardınca Bolqarıstandan Vladimir Dubovu mübarizədən kənarlaşdırıb.

Yarımfinalda London Olimpiadasının gümüş medalçısı gürcü Vladimir Xinçeqaşvili ilə gərgin keçən görüşdə rəqib üstün olub.

Hacı Əliyev Ermənistan təmsilçisi Valodya Franqulyanla bürünc medal uğrunda həlledici görüşə çıxıb. Qarşılaşmada rəqibinə bir xal belə vermədən üstün olan güləşçimiz Avropa Çempionatının bürünc medalına sahib olub.