"Qarabağ"ın futbolçusu Raydell Pupon Hollandiyanın yüksək liqasında mübarizə aparan "Roda" klubuna keçib.

Qaziler.az bildirir ki, "Report"un Kerkrade təmsilçisinin rəsmi saytına istinadən verdiyi məlumata görə, 28 yaşlı hücumçu ilə sonradan daha 1 il uzadıla bilməsi şərti ilə 1 illik müqavilə bağlanılıb.
Pupon "Roda"ya Ağdam klubu ilə müqaviləsini pozaraq transfer olub. O, yeni komandasına yanvarın 12-də Kerkradedə qoşulacaq. "Sarı-qaralar"ın texniki direktoru Ton Kanen bu keçidi belə şərh edib:
"Raydell hiyləgər hücumçudur. Onunla hələ Hollandiya çempionatından tanışam. O, istənilən vəziyyətdən qol vura bildiyini sübuta yetirib. Biz hücumçu mövqeyindəki boşluğu tez doldura bildiyimizdən məmnunuq".
"Roda" Erediviziyada 18 komanda arasında 15-ci yerdə qərarlaşıb. İlk dövrədən sonra komandanın hesabında 16 xal var.
Raydell Pupon "Ayaks"ın futbol akademiyasında yetişib və ilk dəfə Amsterdam komandasının formasını geyinib. Pupon sonradan Hollandiyanın "Villem II", "Sparta", "De Qrafsxap", "Den Haq" və Fransanın "Valansyen" klublarında çıxış edib. O, "Qarabağ"la iyulun ortalarında 2 illik müqavilə bağlamışdı.