İspaniyalı futbol mütəxəssisi Rafael Benites Madrid “Real”ının baş məşqçisi vəzifəsindən uzaqlaşdırılıb. Onu mövsümün sonuna qədər fransalı əfsanəvi futbolçu Zinəddin Zidan əvəz edəcək.

APA TV xəbər verir ki, bu barədə məlumat Madrid klubunun saytında yerləşdirilib.
Ötən axşam “Real”ın prezidenti Florentino Peres klub rəhbərliyi ilə fövqəladə toplantı keçirib. Toplantıda Benitesin qovulması barədə qərar qəbul edilib. İclasdan sonra Florentino Peres mətbuat konfransı keçirib.

Qeyd edək ki, “Real” İspaniya çempionatının son turunda “Valensiya”ya qalib gələ bilməyib. Oyun 2:2 hesablı heç-heçə ilə başa çatıb. Bundan əvvəl “Kral klubu” “Sevilya”, “Barselona” və “Vilyarreal”a məğlub olmuş, “Atletiko” ilə bərabərə qalmışdı.

18 turdan sonra “Real” milli birincilikdə turnir cədvəlinin üçüncü pilləsindədir. “Barselona”nın 39 xalı var. Madrid “Atletiko”su isə 18 oyundan 41 xal toplayıb və hazırda liderdir.

Benites “Real”a ötən ilin iyununda baş məşqçi gətirilmişdi. Bundan dərhal sonra mətbuatda xəbərlər dolaşmağa başlamışdı ki, onun futbolçularla münaqişəsi var. Amma klub belə xəbərləri təkzib edirdi.

Zinəddin Zidana gəlincə, əfsanəvi futbolçu madridlilərin əvəzedicilərini çalışdırırdı.