Yayılan saxta məlumatlarda hücumçunun Funşalda evlənəcəyi iddia olunurdu. Əslində isə burada bir-birinə tanış olmayan bir cütlüyün toy mərasimi keçirilib.

Kilsənin qarşısında minlərlə insan, gələcək bəylə gəlinin fotolarını çəkmək üçün havaya qaldırılmış yüzlərlə smartfon, Avropanın müxtəlif ölkələrindən gəlmiş jurnalistlər... Fabio Santos Ramos və Fatima Nikol Kunha Teyşeyra şənbə günü Funşaldakı Madeyra kilsəsinin qarşısına gəldikdə özlərini əsrin toyunun iştirakçıları kimi hiss ediblər. Lakin izdihamın böyük məyusluğuna səbəb odur ki, onlar avtomobildən Kriştiano Ronaldo və Corcina Rodrigesin deyil, adi bir cütlüyün düşdüyünü görüblər.

Həmin gün futbol superulduzu ilə sevgilisinin evlənəcəyi barədə yayılan şayiə kilsənin qarşısında gözləyən insanların böyük kütləsini yanlış yönləndirərək qarışıqlığa səbəb olub.

Son bir neçə gündə beynəlxalq media, xüsusilə də Britaniya tabloidləri Funşal şəhərindəki kilsədə yaxın zamanda toy keçiriləcəyi barədə məlumatlar yayırdı. Məhz bu şəhərdə “CR7” ləqəbli Kriştiano Ronaldo anadan olub.

Şayiələrə “Savoy Palace” otelində keçirilən tədbir və bayram mərasiminin təşkili üçün otelin iki mərtəbəsinin tamamilə özəl tədbirə ayrılması da səbəb olmuşdu. “The Sun” qəzeti daha əvvəl yazmışdı ki, “müştərilərə cümə və şənbə günləri iki mərtəbənin, eləcə də bir neçə barın istifadəyə bağlı olacağı barədə məlumat verilib”.

Beləliklə, günün ortalarında kilsədə həqiqətən də toy mərasimi keçirilib və beşulduzlu oteldə də özəl tədbir təşkil olunub. Lakin bunların heç birinin məşhur cütlüklə əlaqəsi olmayıb.

“Dernière Heure” saytının məlumatına görə, təxminən 3 min nəfər Funşala gələrək sosial şəbəkələrdə geniş yayılan şayiələrə inanıb.

“Əminliklə deyə bilərəm ki, onların Kriştiano Ronaldo ilə heç bir əlaqəsi yoxdur. Bu gün burada keçirilən yeganə toy budur”, – kilsədəki rekord sayda iştirakçıdan təəccüblənən keşiş bildirib.

Görünür, bu xəbər Kriştiano Ronaldonu da əyləndirib. Futbolçu hadisəyə Instagram hesabında gülməkdən gözləri yaşaran emojilərlə münasibət bildirib.

“Al-Nassr” klubunun hücumçusu isə ötən il evlilik təklifi etdikdən sonra özünün gələcək toyu – bu dəfə həqiqi toy – barədə hələlik heç bir məlumat açıqlamayıb.