UEFA reytinq siyahısını açıqlayıb. Apasport.az saytının məlumatına görə, avrokubokların qrup mərhələsinin V turundan sonra cədvəldə cüzi dəyişikliklər olub. Komandası mübarizəni davam etdirən 28 ölkə təmsilçilərinin iştirakı ilə 3 gün davam edən oyunlarında Azərbaycan klubları da meydana çıxıb. Bakıda İngiltərə “Tottenhem”inə 0:1 hesabı ilə uduzan “Qarabağ” xal hesabımızı artıra bilməyib.

Yunanıstanda PAOK-la qolsuz heç-heçə edən “Qəbələ” isə ölkəmizə 0,250 xal qazandırıb. Nəticədə cari mövsüm əldə olunan əmsalımız 4,375-ə yüksəlib. Hesabımızdakı xalın 1,750-nı “Qarabağ”, 1,625-ni “Qəbələ” qazanıbsa, “İnter” 0,750, “Neftçi” 0,250 xal gətirib. Son 5 mövsümün nəticəsinə görə hesablanan əmsalımız isə 14,875-ə bərabərdi.

Cəmi 0,250 xal qazanmağımız 26-cı pilləni qorumağımıza səbəb olub. Belə ki, bu heç-heçə olmasaydı, Serbiya Azərbaycana çatacaqdı. “Partizan”ın Hollandiyada “Alkmaar”ı məğlub etməsi sayəsində balkanlılar hazırda fərqi 0,250-yə qədər azaldıb.

Qeyd edək ki, Avropanın ən yaxşısı olan İspaniyanın hesabında 93,999 xal var.