Braziliya milli futbol komandası son 20 ildə ilk dəfə Olimpiya Oyunlarına vəsiqə qazana bilməyib.
Qaziler.az xarici mətbuata istinadən bildirir ki, fevralın 12-də Braziliyalılar Parisdə 2024-cü ildə keçiriləcək oyunların Cənubi Amerika seçmə turnirinin final mərhələsində Argentinaya uduzublar.
Karakasda (Venesuela) keçirilən görüş 1:0 hesabı ilə argentinalıların xeyrinə başa çatıb. Vurulan yeganə qolu Lusiano Qondu vurub.
2016 və 2021-ci illərdə Olimpiya Oyunlarında qızıl medal qazanan braziliyalılar turnir cədvəlində üçüncü yerdə qərarlaşıb və vəsiqə qazana bilməyiblər. Belə ki, seçimdə müvafiq olaraq birinci və ikinci yerləri tutan Paraqvay və Argentina Parisdə çıxış edəcəklər.
Yay Olimpiya Oyunları 2024-cü il iyulun 26-dan avqustun 11-dək Parisdə keçiriləcək.
QAZİLER.AZ
