Azərbaycan çempionu "Qarabağ"ın Avropa Liqasının qrup mərhələsində keçirdiyi ikinci oyunda Belçikanın "Anderlext" klubuna qalib gəlməsi azarkeşlərə sevincli anlar yaşadıb. APA TV-nin məlumatına görə, Tofiq Bəhramov adına Respublika Stadionunda keçirilən oyun bitən kimi azarkeşlər Azadlıq meydanına doğru yürüş keçiriblər. Meydana toplaşan "Qarabağ"lı fanatlar qələbə şüarları səsləndiriblər.

"Qarabağ" klubunun fanatlarından Müşfiq Məmmədovun sözlərinə görə, klubları bu dəfə də onların ümidlərini doğruldub: "Çox gözəl oyun oldu. Başda Qurban Qurbanov olmaqla bütün "Qarabağ" heyətinə öz təşəkkürümüzü bildiririk. Bu qələbənin davamını gözləyirik. O gün olsun klubumuzun qələbəsini Qarabağımızda qeyd edək".

"İmarət" azarkeşlər klubunun İdarə Heyətinin üzvi Elnur Quliyev isə "Qarabağ"ın qələbəsi münasibətilə xalqımızı təbrik edib: "Qələbəmizi üstü açıq avtobuslarla şəhər turuna çıxmaqla qeyd etdik. Bundan sonrakı oyunlarda da komandamıza dəstək olaraq qələbə yürüşləri keçirəcəyik. İnşallah, Qarabağımız azad olunsun, bu qələbə yürüşünü Ağdamda, Şuşada keçirəcəyik".

Qeyd edək ki, "Qarabağ" azarkeşlərinin keçirdiyi qələbə yürüşü iki saata yaxın davam edib.