Xorvatiyanın Futbol İttifaqı Ante Çaçiçi milli komandanın baş məşqçisi vəzifəsinə təyin edib. Zaqreb "Lokomotiv"ini də çalışdıran futbol mütəxəssisi ilə müqavilə 2018-ci ildə Rusiyada keçiriləcək dünya çempionatına qədər planlaşdırılır. Məşqçilər heyətinə Xorvatiya millisinin sabiq futbolçuları Yosip Şimuniç və Ante Mişe də daxildir.

Xatırladaq ki, Xorvatiyanın futbol millisinin baş məşqçisi Niko Kovaç sentyabrın 9-da vəzifəsindən uzaqlaşdırılıb. Onun millinin baş məşqçisi postundan kənarlaşdırılmasına 2016-cı ilin Avropa çempionatının seçmə mərhələsi çərçivəsində Azərbaycan və Norveç yığmalarına qarşı uğursuz oyunlar səbəb olub. Xorvatlar Bakıda qolsuz heç-heçə ediblər, Norveç millisinə isə 0:2 hesabı ilə məğlub olublar.

Ante Çaçiç məşqçilik karyerasına 1992-ci ildə başlayıb. O, Zaqreb "Dinamo"su ilə ilə 2012-ci ildə Xorvatiya kuboku və çempionluğunu, 2013-cü ildə isə "Maribor"la Sloveniya Superkubokunu qazanıb.

Avropa çempionatının seçmə mərhələsinin bitməsinə iki tur qalmış Xorvatiya millisi 14 xalla üçüncü pillədədir. Xorvatlar İtaliya millisindən 4, Norveç yığmasından isə 2 xal geri qalır.