Peşə seçimi getdikcə çətinləşir: dünya hər gün dəyişir və gələcəkdə hansı ixtisasların aktual olacağını proqnozlaşdırmaq həmişə mümkün olmur.
AZƏRTAC Avropa mediası ilə bağlı apardığı araşdırmalara əsaslanaraq, yaxın 10 ildə tələbat olacaq 9 peşəni müəyyənləşdirib.
Səhiyyə - həkimlərə, tibb bacılarına, psixiatrlara və digər mütəxəssislərə, xüsusən də bu sektorun əhəmiyyətini vurğulayan COVID-19 pandemiyasından sonra tələbat qalmaqdadır.
Su təsisatı ustası, elektrik və qaz işçiləri - bu peşələri avtomatlaşdırmaq çətindir və insanlar gündəlik problemləri həll etmək üçün onlara ehtiyac duyacaqlar.
Şəxsi maliyyə məsləhətçiləri - 2031-ci ilə qədər bu sahədə vakansiyaların sayının 15% artacağı proqnozlaşdırılır.
Daşınmaz əmlak, müqavilələrin tərtib edilməsi və boşanmalarda hüquqi yardım - yaxın 10 ildə vəkillərin sayının 10% artacağı gözlənilir.
Aşpazlar - onlara həmişə restoran sənayesində tələbat var və istəyənlər bu peşəni seçə bilərlər. Yemək bişirməyi və yeni reseptlər yaratmağı sevirsinizsə, aşpaz olmaq karyera yüksəlişi üçün bir şansdır.
Kibertəhlükəsizlik mütəxəssisləri - həm korporativ, həm də şəxsi məlumatların qorunmasını təmin edirlər və bu peşəyə uzun müddət tələbat olacaq. Xüsusilə internet məkanında artan təhlükələr fonunda, şəxsi məlumatların qorunması ehtiyacının getdikcə aktuallaşdığı bir vaxtda onlar üçün iş yerləri artacaq.
Baytarlar – ev heyvanlarının sayının artması ilə baytarlıq peşəsinə tələbat davam edəcək. Ekzotik heyvanlar üzrə mütəxəssislər xüsusilə rəqabətin daha aşağı olduğu yerlərdə tələb olunur.
Onlayn ticarət - bu sahə sürətlə böyüməyə davam edir.
Logistika menecerləri və ya onlayn mütəxəssislər kimi e-ticarətdə vəzifələr – internetin inkişafı ilə bu peşə sahiblərinə əmək bazarında tələbat artacaq.
HR menecerləri - onlar kadrların idarə edilməsində mühüm rol oynayır və işçilərin rifahına diqqət yetirirlər. Korporativ mədəniyyətin inkişafı və iş şəraitinin yaxşılaşdırılması ilə HR mütəxəssislərinin rolu yalnız artacaq.
Sadalanan peşələr təkcə sabitlik vəd etmir, həm də gələcək onilliklərdə karyera yüksəlişi üçün imkanlar açır. Əgər gənclər uzunmüddətli karyera qurmağı planlaşdırırsa, bu sahələrə diqqət yetirməlidirlər.
