Heydər Əliyev Fondu Qax şəhərində V.Əliyev adına 3 saylı məktəbi yenidən tikərək istifadəyə verib.

QAZİLER.AZ  APA-nın Şimal-qərb bürosuna istinadən verdiyi məlumata görə, bununla bağlı keçirilən tədbirdə Heydər Əliyev Fondunun nümayəndəsi Elvin Aslanov, Elm və Təhsil Nazirliyinin nümayəndəsi İlahə Rəsulova, Qax rayon İcra Hakimiyyətinin başçısı Musa Şəkiliyev, məktəbin müəllim və şagird kollektivi, valideynlər və rayon ziyalıları iştirak edib.

Tədbirdə vurğulanıb ki, Qax şəhərindəki V.Əliyev adına 3 saylı tam orta məktəb 1950-ci ildə inşa olunduğundan istifadəyə yararsız vəziyyətə düşüb. Heydər Əliyev Fondunun bu ilin yanvarında yeni məktəbin tikintisi ilə bağlı apardığı işlər artıq yekunlaşıb və təhsil ocağı yeni tədris ilində şagird və müəllimlərin ixtiyarına verilib.

Üç mərtəbə və üç korpusdan ibarət olan təhsil müəssisəsi 320 şagird yerlikdir. Məktəbdə yaradılan 14 sinif otağı, fizika, kimya, biologiya laboratoriyaları, informatika, hərbi təlim, qızlar və oğlanlar üçün əmək təlimi otaqları, kitabxana, yeməkxana, akt zalı və idman zalları zəruri mebel və avadanlıqlarla, əyani vəsaitlərlə tam təchiz edilib. Təhsil müəssisəsində açıq idman meydançası da qurulub. Məktəbin həyətyanı ərazisində abadlıq və yaşıllaşdırma işləri görülüb