Bu gün Təbrizdə keçirilən futbol matçında azarkeşlər kütləvi şəkildə siyasi şüarlar qışqırıblar.

Olay Təbrizin yerli klubu "Traxtur" ilə Tehranın "İstiqlal" komandalarının arasında keçirilən çempionat oyunu zamanı baş verib.

Minval.az saytının xəbərinə görə, Təbriz stadionunu doldurmuş minlərlə azarkeş bir ağızdan "Azərbaycan" deyə şüarlar səsləndirib, daha sonra "Təbriz-Bakı-Ankara, biz hara, farslar hara" hayqırıblar.

Baş verə biləcək iğtişaşların qarşısını almaq üçün stadiona hüquq-mühafizə orqanlarının xeyli əməkdaşı cəlb edilib.

Oyun qolsuz bərabərliklə başa çatıb.

Dekabrın 28-də Tehranda keçirilən "Persipolis"-"Traxtur" matçında tehranlı azarkeşlər cənubi azərbaycanlıların ünvanına təhqiramiz şüarlar səsləndirmişdilər. Təbrizlilər isə bu təhqirə bu gün bu cür cavab veriblər.

Xatırladaq ki, təbrizli futbol azarkeşləri illərdir stadionda bu şüarları səsləndirirlər. Hətta hazırda kütləvi aksiyalar keçirilən Məşhəd, Qum, Tehran kimi şəhərlərdə tam sakitlik olanda Təbriz stadionunda həmişə bu cür şüarlar səslənir, transparantlar qaldırılırdı.

">