Azərbaycanda qaytarılması məcburi olan mal və nəqliyyat vasitələrinin gömrük ərazisinə qaytarılmamasına görə sanksiyalar dəyişdirilə, əcnəbilər və vətəndaşlığı olmayan şəxslər isə bu hala görə inzibati qaydada Azərbaycanın hüdudlarından kənara çıxarıla bilər.

Qaziler.az bildirir ki, Milli MəclisdənTrend-ə verilən məlumata görə, bununla bağlı İnzibati Xətalar Məcəlləsinə dəyişiklik təklif edilir.

Hazırda aparılması və ya qaytarılması məcburi olan əvvəllər gətirilmiş və ya aparılmış mallar və nəqliyyat vasitələrinin Azərbaycanın gömrük ərazisindən kənara aparılmamasına və ya bu əraziyə qaytarılmamasına görə inzibati xətanın bilavasitə obyekti olan mallar və ya nəqliyyat vasitələri müsadirə edilir. Yaxud həmin mallar və ya nəqliyyat vasitələrinin dəyərinin 75 faizindən 100 faizinədək məbləğdə cərimə edilir.

Yeni dəyişiklikdə isə təklif edilir ki, bu hala görə əcnəbilər və vətəndaşlığı olmayan şəxslər də həmin malların və ya nəqliyyat vasitələrinin dəyərinin 75 faizindən 100 faizinədək cərimə edilsin və inzibati qaydada ya Azərbaycanın hüdudlarından kənara çıxarılsın.

Dəyişiklik aparılması və ya qaytarılması məcburi olan əvvəllər gətirilmiş və ya aparılmış mallar və nəqliyyat vasitələrinin Azərbaycanın gömrük ərazisindən kənara aparılmamasına və ya bu əraziyə qaytarılmamasına görə inzibati tənbeh tədbiri kimi əcnəbilər və vətəndaşlığı olmayan şəxslərin inzibati qaydada Azərbaycanın hüdudlarından kənara çıxarmaq məqsədilə edilir.

Qeyd edək ki, layihə Milli Məclisin iyunun 24-də keçiriləcək plenar iclasında müzakirəyə çıxarılacaq.