ABŞ tərəfindən tətbiq edilən sanksiyalarla əlaqədar olaraq, İran aviaşirkətləri ilə hər hansı işgüzar münasibətlər qadağandır və bu qərar Gürcüstana da şamil edilir.

Qaziler.az xəbər verir ki, bu barədə aviasiya eksperti İase Zautaşvili yerli mediaya müsahibəsində bildirib. Onun sözlərinə görə, Gürcüstan və İran arasında uçuşlar, çox güman ki, bu gündən etibarən dayandırılacaq.

Məsələ burasındadır ki, ABŞ-nin sanksiya siyahısına Gürcüstana reyslər yerinə yetirən 5 İran aviaşirkəti də daxildir. Zautaşvilinin sözlərinə görə, İranla hava yolu vasitəsilə yük daşımaları həyata keçirilmirdi, ona görə də bu baxımdan iqtisadi nəticələr olmayacaq, lakin məhdudiyyət iranlı turistlərin və sərnişinlərin axınına mənfi təsir göstərəcək. İndi onlar Gürcüstana gəlmək üçün alternativ (quru və ya tranzit) yollar axtarmalı olacaqlar.

"Tehran — Tbilisi və Tehran — Batumi marşrutlarında yalnız İran aviaşirkətləri fəaliyyət göstərirdi. Təbii ki, onlar əsasən İran vətəndaşlarını, turistləri və işgüzar səfər edənləri daşıyırdılar. Sərnişin axını, şübhəsiz ki, əsasən Gürcüstana gələn turistlərdən ibarət idi", - ekspert bildirib.

O vurğulayıb ki, minlərlə turist Gürcüstana hava yolu ilə gəlirdi və təəssüf ki, indi onlar bunu edə bilməyəcəklər. Beləliklə, Gürcüstanda xərclənən vəsaitin həcmi azalacaq. Bu da şübhəsiz ki, iqtisadiyyata çox pis təsir edəcək.

QAZİLER.AZ