25 yaşlı Özbəkistan vətəndaşı Rusiya tərəfində hərbi əməliyyatlarda iştirak etməkdə təqsirli bilinib.

Həmin şəxs narkotiklə əlaqəli cinayətə görə həbsxanadan vaxtından əvvəl azadlığa buraxılmaq üçün hərbi müqavilə imzalayıb.

Qaziler.az-n məlumatına görə, UzNews.uz məhkəmənin hökmünə istinadən xəbər verir ki, Cambay Rayon Cinayət Məhkəməsində muzdlu fəaliyyətdə ittiham olunan 25 yaşlı F.G.-yə qarşı işə baxılıb.

İş materiallarına görə, təqsirləndirilən şəxs 2021-ci ildə pul qazanmaq üçün Rusiyaya gedib. Daha sonra narkotik qaçaqmalçılığına görə yeddi il müddətinə azadlıqdan məhrum edilib.

O, 2025-ci ilin iyul ayında erkən azadlığa çıxmaq məqsədi ilə hərbi müqavilə imzalayıb. Luqanskda hərbi təlim keçib və döyüş əməliyyatlarında iştirak edib. Yaralandıqdan sonra hərbi hospitala aparılıb və daha sonra istirahətə göndərilib, oradan qaçaraq Özbəkistana qayıdıb.

Məhkəmə vətəndaş F.G.-ni Özbəkistan Respublikası Cinayət Məcəlləsinin 154-cü maddəsinin 1-ci hissəsində (muzdluluq) nəzərdə tutulan cinayəti törətməkdə təqsirli bilib və ona beş il azadlığın məhdudlaşdırılması cəzası verilib.

QAZİLER.AZ