Təkcə son 24 saat ərzində Rusiya işğalçıları Ukraynanın enerji obyektlərinə 26 dəfədən çox hücum edib. Hər gün bir neçə bölgə hücuma məruz qalır.

Qaziler.az-ın məlumatına görə, RBC-Ukrayna Energetika Nazirliyinin Facebook səhifəsinə istinadən xəbər verir ki, bunu Ukraynanın energetika naziri Svetlana Qrinçuk bildirib.

Qrinçuk G7 səfirləri ilə görüşüb və Rusiyanın davamlı hücumları fonunda qışdan əvvəl Ukraynanın əsas ehtiyaclarını açıqlayıb.

"Təkcə son 24 saat ərzində biz enerji obyektlərimizə 26-dan çox hücum gördük. Sumı, Çerniqov, Xarkov, Dnepropetrovsk, Donetsk, Odessa və Poltava vilayətləri faktiki olaraq hər gün düşmən hücumu altındadır", - Qrinçuk qeyd edib.

Onun sözlərinə görə, Ukrayna kritik infrastrukturu qorumaq üçün ilk növbədə əlavə hava hücumundan müdafiə və elektron müharibə sistemlərinə ehtiyac duyur. Həmçinin enerji obyektləri üçün passiv fiziki müdafiəni inkişaf etdirmək lazımdır.

O, partnyorları sıradan çıxanı əvəz etmək üçün əlavə enerji avadanlığı ilə kömək etməyə çağırıb.

QAZİLER.AZ