Rusiyanın Smolensk vilayətində dəmir yolu keçidində yük qatarı ilə ağır tonnajlı yük maşını toqquşub. Yanacaqla dolu 18 vaqon relsdən çıxıb.

Bu barədə ASTRA Telegram kanalına istinadən RBC-Ukrayna məlumat yayıb.

Qəza yerli vaxtla səhər saat 7:26 radələrində Moskva Dəmiryolunun Rudnya və Qolinki stansiyaları arasında baş verib. Orada yük maşınının sürücüsü yaxınlaşan yük qatarının qarşısındakı keçidə keçib.

Rusiya səlahiyyətliləri qatarın maşinistinin təcili əyləc tətbiq etdiyini, lakin məsafənin yetərli olmadığını və toqquşmanın qarşısını almaq mümkünsüz olduğunu deyir. Hadisə nəticəsində lokomotiv heyəti xəsarət alıb, maşinist və maşinist köməkçisi isə orta-ağır xəsarətlərlə xəstəxanaya yerləşdirilib.

İlkin məlumata görə, qəza nəticəsində lokomotiv və 18 benzin vaqonu relsdən çıxıb. Güclü yanğın baş verib. Həmin hissədə qatarların hərəkəti dayandırılıb.

QAZİLER.AZ