Ukrayna Təhlükəsizlik Xidməti Kiyevin tam mərkəzində terror aktı törətmək cəhdinin qarşısını alıb. İyulun 23-ü axşam saatlarında Ukraynanın xüsusi xidmət orqanları paytaxtda kafedə partlayış törətmək istəyən qadını saxlayıb.

Qaziler.az bildirir ki, bu barədə RBC-Ukrayna Ukrayna Təhlükəsizlik Xidmətinə istinadən məlumat yayıb.

UTX-nin verdiyi məlumata görə, qadın kafedə ümumi tutumu təxminən 1,5 kiloqram trotil ekvivalenti olan iki əldəqayırma partlayıcı qurğu yerləşdirmək istəyib. Və sonra Rusiya xüsusi xidmət orqanları maksimum sayda insanı öldürmək üçün axşam gur saatlarında hər iki cihazı uzaqdan partlatmağı planlaşdırıblar.

İstintaq müəyyən edib ki, Rusiyanın sifarişini işğalçıların “yad bayraq" altında terror aktı törətmək üçün cəlb etdikləri Kiyev sakini yerinə yetirib və qadını onun guya Ukrayna xüsusi xidmət orqanlarının tapşırığını yerinə yetirməli olduğuna inandırıb.

UTX saxlanılan şəxsin mobil telefonunu onun işğalçılarla əlaqəsinin sübutu olaraq götürüb. İndi onun partlayıcıları necə əldə etdiyini müəyyənləşdirirlər. 

QAZİLER.AZ