İsrail tərəfdarı olan “Predatory Sparrow” haker qrupu İranın böyük bankı “SEPAH”a kiberhücum edib və onun fəaliyyətini geniş şəkildə pozub.

Qaziler.az-ın məlumatına görə, “Axios” xəbər verir ki, hücum İsrail və İran arasında münaqişənin son raundunda İranın kritik infrastrukturuna ilk ictimai kiberhücum kimi görünür.

Fars adı “Gonjeshke Darande” ilə də tanınan “Predatory Sparrow” İranın dövlət bankı “SEPAH”a qarşı bir sıra kiberhücumlara görə məsuliyyəti öz üzərinə götürüb. Hakerlər həmçinin bank sistemindən məlumatları məhv etdiklərini iddia ediblər.

“Diktatorun terror fantaziyalarını dəstəkləməyə həsr olunmuş qurumların aqibəti belə olur”, - haker qrupu “X” (Twitter) də yazıb.

“Bank Sepah”ın müştəriləri hesablarına daxil olmaqda, nağd pul çıxarmaqda və kartla ödəniş etməkdə problemlərlə üzləşiblər. İranın dövlət mediası xəbərdarlıq edib ki, fasilə bütün ölkə üzrə yanacaqdoldurma məntəqələrinə təsir göstərə bilər, çünki onların əməliyyatları emal üçün “Bank Sepah”dan asılıdır. “Bank Sepah”ın özü kiber hücumla bağlı heç bir açıqlama verməyib.

QAZİLER.AZ