Ukrayna prezidenti Vladimir Zelenski kəşfiyyata AZAL-ın təyyarə qəzası ilə bağlı məlumatları partnyorları ilə paylaşmağı tapşırıb. Sərnişin təyyarəsi çərşənbə günü Qroznıda (Çeçenistan) eniş edə bilməyib və Qazaxıstanda qəzaya uğrayıb.

Qaziler.az bildirir ki, bu barədə RBC-Ukrayna prezidentin axşam müraciətinə istinadən xəbər verir.

Onun sözlərinə görə, “Azərbaycan Hava Yolları”nın təyyarəsinin qəzaya uğraması ilə bağlı bütün həqiqəti müəyyən etmək olar və Rusiya heç nəyi gizlədə bilməz.

“Ukrayna lazım olan bütün yardımı göstərəcək və biz sizi bu vəziyyətdə Azərbaycanı dəstəkləməyə çağırırıq. Hər bir ölkəni Rusiyaya təzyiq göstərməyə çağırırıq ki, MH-17 ilə bağlı, Donetsk vilayətində vurulan Boeing haqqında yalanlar dayansın”, - Zelenski qeyd edib.

O, həmçinin Rusiyada təyyarənin hədəfə çevrilməsinə icazə verənlərə görə məsuliyyətin yaradılmasının zəruri olduğunu bildirib.

“Bu gün mən baş verənlərlə bağlı kəşfiyyat hesabatını və əlimizdə olan məlumatları eşitdim”, - deyə prezident əlavə edib.

Bundan əvvəl hərbi kəşfiyyat rəhbəri Kirill Budanov Qazaxıstanda qəzaya uğrayan sərnişin təyyarəsinin vurulduğunu bildirib.

“Bildiyimizə görə, təyyarə Rusiya ərazisində Rusiyanın “Pantsir S1” hava hücumundan müdafiə sistemi tərəfindən vurulub.

Qeyd edək ki, Amerika kəşfiyyatı da bu versiyanı istisna etmir. “Reuters”in istintaqla tanış olan mənbələrə istinadən yazdığı kimi, “Embraer 190” təyyarəsi Çeçenistanda pilotsuz uçuş aparatlarının aktiv şəkildə fəaliyyət göstərdiyi zonadan kənara çıxdıqdan sonra atəşə məruz qalıb.

Yada salaq ki, bu gün Azərbaycan prezidenti İlham Əliyev bildirib ki, təyyarə Rusiya üzərində fiziki və texniki müdaxiləyə məruz qalıb, bundan sonra idarəetməni tamamilə itirib.

Vladimir Putin üzr istəsə də, Azərbaycan təyyarəsinə qarşı hava hücumundan müdafiə sisteminin fəaliyyət göstərdiyini etiraf etməyib", - RBK-Ukrayna yazır.

QAZİLER.AZ.