Türkiyənin Elazığ vilayətinin Maden rayonunda Gezin və Təpəcik kəndləri arasındakı meşəlik ərazidə yanğın baş verib. Təxminən 7 saat ərzində yanğınsöndürmə briqadalarının müdaxiləsi ilə yanğın nəzarət altına alınıb, lakin yüzlərlə hektar ərazi külə dönüb.

Qaziler.az Türkiyə mətbuatına istinadən bildirir ki, Gezin və Təpəcik kəndləri sərhədində yerləşən Gözərik ərazisində naməlum səbəbdən yanğın baş verib. Küləyin təsiri ilə geniş əraziyə yayılan yanğın Təpəcik kəndinə doğru irəliləyib.

Yanğına Meşə Region Müdirliyi qrupları, xilasetmə qrupları, vilayət Xüsusi İdarəsi, jandarma, Maden və Sivrice bələdiyyələrindən qruplar, mahal bələdiyyəsi qrupları və TEDAŞ qrupları müdaxilə edib.

Geniş əraziyə yayılan yanğının söndürülməsinə helikopterlər də  dəstək verib. Təxminən 7 saat davam edən gərgin mübarizədən sonra yanğın nəzarət altına alınıb.

Yüzlərlə hektar ərazinin yanaraq külə döndüyü yanğın sahəsi dron ilə havadan görüntülənib.

QAZİLER.AZ