“İstintaqın sirləri”, “Univer. Yeni hostel” və “İz” seriallarından tanınan rusiyalı aktyor Roman Klementyev 59 yaşında dünyasını dəyişib.

Bu barədə aktyor Dmitri Şulqin cümə axşamı, mayın 30-da özünün Facebook səhifəsində məlumat verib.

Sənətçi mayın 29-u çərşənbə günü dünyasını dəyişib. Ölümün səbəbləri açıqlanmır.

Roman Klementyev 2 aprel 1965-ci ildə anadan olub. 1987-ci ildə Dövlət Litva Konservatoriyasının teatr sənəti fakültəsini bitirib.

NSN yazır ki, aktyor karyerası ərzində 30-a yaxın film və serialın çəkilişlərində iştirak edib. Onun layihələri arasında “Canlı”, “Adi qadın”, “Tətik” və s. filmləri var.

Klementyev 2000-ci illərin sonlarında filmlərdə və seriallarda rol almağa başlayıb.