Xersonun atəşə tutulması nəticəsində 8 nəfər yaralanıb, ölənlər barədə məlumat yoxdur.

Bu barədə Ukrayna Daxili İşlər Nazirliyi məlumat verib.

Həmçinin liman ərazisində qayıqlarda insanları təxliyə edən könüllülər, ukraynalı jurnalistlər və Ukraynanın baş ravvini də Xersonda atəşə tutulub.

Onların yaydıqları videolarda ərazidə baş verənlər əks olunub.

Mənbə: UNİAN

17:02

Rusiya qoşunları Kaxovskaya Su Elektrik Stansiyasının partlaması nəticəsində yaranan daşqınlar səbəbindən çətin vəziyyətə düşən Xersonu atəşə tutur.

Bu barədə Xerson Vilayət Hərbi Administrasiyasının rəhbəri Aleksandr Prokudin “Telegram” kanalında paylaşım edib.

“Rusiyalılar Xersonu atəşə tutur. Sahilyanı ərazilər və şəhərin mərkəzi hissəsində”, - deyə o, paylaşımında qeyd edib.

Qeyd edək ki, Kaxovka Su Elektrik Stansiyasının partladılması nəticəsində Ukraynanın Xerson vilayətinin işğal altındakı Oleşki şəhəri tamamilə su altında qalıb.

Şəhərin su altında qalması nəticəsində üç nəfər həyatını itirib və ölənlərin sayının artacağı istisna edilmir.

Xilasedicilərin daşqın zonasından minlərlə insanı təxliyə etməyə çalışır, bir çoxları xilas olmaq üçün evlərinin damına çıxıblar.

Kaxovka Su Elektrik Stansiyasının bəndinin partladılmasından sonra Xerson vilayətində su basan yaşayış məntəqələrinin sayı 100-ə çatıb. Vilayətin subasmaya məruz qalmış bəzi qəsəbə və kəndləri ilə əlaqə kəsilib. (oxu.az)