Azərbaycanın rəsmi mövqeyi: Kürd referendumunu qəbul etmirik! “Azərbaycan kürdlərin referendum keçirməsinə dəstək vermir. Biz İraqın ərazi bütövlüyünün pozulmasını qətiyyətlə pisləyirik. Rəsmi mövqeyimiz bundan ibarətdir”.

QAZİLER.AZ saytı xəbər verir ki, bunu AzVision.az-a politoloq, millət vəkili Rasim Musabəyov deyib. Deputat qeyd edib ki, bu, təkcə Azərbaycanın yox, Türkiyənin, İranın, ABŞ-ın, Avropa ölkələrinin də mövqeyidir:

“Bu referendumu İsrail dəstəkləyir. Ola bilsin, hansısa Avropa ölkələri də dəstəkləsin. Ancaq, ümumi yanaşma belədir ki, İraqın dağılmasını bütün dünya ölkələri pisləyir. Referendum eyni zamanda Suriyanın dağılması deməkdir. Onsuzda regionda vəziyyət qeyri-sabitdir. Bütün bunlar vəziyyəti daha da gərginləşdirir”.

R.Musabəyov vurğulayıb ki, referendumun keçirilməsi hələ müstəqilliyin elan olunması demək deyil: “Referendum məsələsində Bərzaniyə Türkiyənin, İranın kifayət qədər sərt təzyiqləri var. Bu isə Bərzaninin İraqın mərkəzi hakimiyyəti ilə danışıqlara gedərək hansısa razılığa gəlməsinə gətirib çıxara bilər”.

Millət vəkili hesab edir ki, referendum rəsmi Bağdadla kürdlər arasında müharibənin başlanmasına səbəb olacaq: “Söhbət təkcə Kürdüstanın ayrılması yox, ona daxil olmayan ərazilərin də özlərinə qatmaq niyyətlərindən gedir. Bu, əslində Bağdadla müharibənin başlamasıdır. Ona görə də hansısa danışıqlar başlana bilər. Heç kim istəməz ki, İŞİD-lə müharibə başa çatmamış, yeni bir müharibə başlasın”.