Almaniyada fəaliyyət göstərən Dünya Azərbaycanlıları Assambleyası (DAA) Ermənistan silahlı qüvvələrinin Azərbaycanın Füzuli rayonun Alxanlı kəndinin mülki əhalisini atəşə tutması nəticəsində 1967-ci il təvəllüdlü Sahibə Quliyeva və onun 2 yaşlı nəvəsi Zəhra Quliyevanın öldürülməsi ilə bağlı etiraz aksiyası keçirəcək.

Bu barədə Modern.az-a məlumat verən DAA-nin prezidenti Rəşad Quliyev deyib ki, aksiyanıniyulun 9-da saat 15:00-da Berlində Ermənistan səfirliyinin qarşısında keçirilməsi nəzərdə tutulub.

R.Quliyev bildirib ki, təxminən 100-dən çox insanın iştirakı ilə keçiriləcək etiraz aksiyasında “Uşaq qatili Sarkisyan”, “İşğalçı ordu Azərbaycan ərazilərini tərk et” şüarları səsləndirəcək.

DAA prezidenti qətliamın Almaniya mətbuatında da işıqlandırılacağını deyib:
“Bu məsələlər mütləq dünya mətbuatında işıqlandırılmalıdır ki, Avropa toplumu Sarkisyanın cinayətkar rejiminin nələrə qadir olduğunun bir daha şahidi olsun”.