Azərbaycanda rus dilinin tədrisi və təbliği istiqamətində çox böyük işlər görülür.

Bakı Slavyan Universiteti bu baxımdan nümunə ola bilər. Rusiya ilə Azərbaycan arasında informasiya siyasəti sahəsində qarşılıqlı fəaliyyət də yüksək səviyyədə qurulub.

Bu sözləri Rusiya Federasiyasının MDB işləri üzrə, xaricdə yaşayan həmvətənlər və Beynəlxalq Humanitar Əməkdaşlıq üzrə Federal Agentliyinin (“Rossotrudniçestvo”) rəhbəri Lyubov Qlebova noyabrın 9-da Moskvada işə başlayan “MDB-nin 25 illiyi: qarşılıqlı anlaşma, əməkdaşlıq, inkişaf” mövzusunda Açıq Beynəlxalq Forumda jurnalistlərə müsahibəsində deyib.

Media tərəfdaşlarından biri Azərbaycan Dövlət İnformasiya Agentliyi (AZƏRTAC) olan bu forumda birgə humanitar layihələrin səmərəsinin artırılması, elmi, təhsil və biznes dairələrinin rolunun gücləndirilməsi, habelə MDB üzvü olan dövlətlərin çoxtərəfli humanitar əməkdaşlığı ilə bağlı qarşıda duran digər məsələlər panel diskussiyaları, tematik konfranslar, “dəyirmi masa”lar və seminarlar çərçivəsində müzakirə olunur.

Lyubov Qlebova qeyd edib ki, Federal Agentlik Rusiyada qeyd olunan Ailə, Sevgi və Sədaqət Günü münasibətilə uzun illər birlikdə yaşayan ər-arvadlara mükafatlar təqdim edir. “Azərbaycanda belə ailələrin sayı çoxdur. Bu il isə tərkibində həm rus, həm də azərbaycanlı olan beynəlmiləl ailələrə də mükafatlar təqdim edilib”, - deyə o vurğulayıb.

“Rossotrudniçestvo”nun rəhbəri MDB ölkələri arasında təhsil sahəsində əlaqələrin genişlənməsindən söhbət açaraq bildirib ki, hər il Rusiyada 15 min əcnəbi tələbə bu dövlətin büdcəsi hesabına təhsil alır. Pullu əsaslarla, habelə işəgötürənlərin göndərişləri ilə ali məktəblərdə oxuyanları da nəzərə alsaq, bu rəqəm 260 mini keçir.

Forumun açılışında çıxış edən Rusiya Federasiyası Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy bildirib ki, MDB ölkələrinin hər biri müstəqil daxili və xarici siyasət yürüdür. Buna baxmayaraq, bizim ümumi keçmişimiz və gələcəyimiz var. Gənclərimiz yaxşı başa düşürlər ki, milli məkanda fəaliyyət göstərmək yaxşıdır, lakin əməkdaşlıq əlaqələri dünya səviyyəsinə çıxmağa imkan verir.

Dövlət Dumasının MDB, Avrasiya İnteqrasiyası və Həmvətənlərlə İş Komitəsinin sədri Leonid Kalaşnikov Dövlət Dumasının MDB Parlamentlərarası Assambleyasının Sankt-Peterburqda keçiriləcək iclasında yaxından iştirak edəcəyini, habelə dekabr ayında Dumada MDB-nin 25 illik yubileyi ilə əlaqədar “dəyirmi masa” keçiriləcəyini bildirib.

MDB ölkələrinin ümumi iqtisadi və humanitar məkana malik olduğunu qeyd edən Rusiya Federasiya Şurasının üzvü Sergey Kalaşnikov deyib: “Başlıcası isə insan faktorudur. Ölkələrimizin xalqları arasında illərlə sınaqdan çıxmış əlaqələr mövcuddur. Bu isə MDB-nin uğurunun başlıca rəhnidir”.

Forumda MDB –nin 25 illik yubileyi münasibətilə mükafatlar təqdim olunub. Azərbaycan ilə Rusiya arasında əlaqələrin inkişafına töhfəsinə görə “Novosti-Azərbaycan” agentliyinin baş redaktoru Gülnarə Məmmədzadə “Rossotrudniçestvo”nun fəxri nişanı ilə təltif edilib. Bakı Slavyan Universitetinin kollektivi rus dilinin təbliğində xidmətlərinə görə diplomla mükafatlandırılıb. “Report” agentliyinin əməkdaşı Şamil Əlibəyova Rusiya mədəniyyətinə, tarixinə, rəmzlərinə və ənənələrinə həsr olunmuş “Rusiyaya rəğbətimin beş səbəbi” adlı foto müsabiqəsinin diplomu təqdim olunub. Müsabiqənin diplomantları arasında Türkiyənin Bilkənd Universitetinin tələbəsi Burak Doğan da var.

Forum öz işini panellər, diskussiyalar və “dəyirmi masa”larda davam etdirir.