İran Xarici İşlər Nazirliyi ölkə ərazisində İran hakimiyyətindən müvafiq lisenziya alınmadan "Starlink" peyk rabitəsi xidmətlərinin göstərilməsinin davam etdirilməsi ilə əlaqədar rəsmi etiraz notası təqdim etmək üçün Norveç Krallığının Tehrandakı səfiri Paul Byornstadı nazirliyə çağırıb.

Qaziler.az xəbər verir ki, bu barədə İRNA agentliyi məlumat yayıb.

İran XİN-in Beynəlxalq Sülh və Təhlükəsizlik Məsələləri Departamentinin direktoru Məhəmməd Həsənnejad Pirkuhi norveçli diplomatla görüşündə texnoloji platformaların siyasi məqsədlər üçün istifadə edilməsinin yolverilməz olduğunu bildirib. İran xarici siyasət idarəsinin məlumatına görə, ABŞ administrasiyası və İsrail strukturları "Starlink" peyk interneti terminallarından İranın daxili işlərinə müdaxilə edən və ölkənin milli təhlükəsizliyini sarsıdan fəaliyyətlərin təşkili üçün istifadə edirlər.

İranlı diplomat vurğulayıb ki, baş verənlərə görə Norveç birbaşa hüquqi məsuliyyət daşıyır, çünki məhz bu ölkə Beynəlxalq Telekommunikasiya İttifaqının (BTİ) strukturlarında "Starlink" peyk şəbəkəsinin rəsmi qeydiyyatdan keçdiyi yurisdiksiyadır.

İran XİN Norveç hökumətindən vəziyyətə dərhal müdaxilə etməsini və ölkənin suverenliyinin pozulmasına son qoyulmasını tələb edib. Səfirə Tehrandan gələn bu mövqeyi ən qısa zamanda Norveç paytaxtına çatdırmağın vacibliyi bildirilib.

QAZİLER.AZ