Türkiyənin Baş naziri Əhməd Davudoğlu Belçikanın paytaxtı Brüsseldə NATO-nun Baş katibi Yens Stoltenberq ilə görüşüb. Axar.az xəbər verir ki, görüşdən sonra mətbuat konfransında danışan Davudoğlu Türkiyənin heç bir ölkədən üzr istəməyəcəyini bəyan edib:

“Rusiya ilə danışmağa hazırıq. NATO-nun verdiyi dəstəyə görə də təşəkkür edirik. Bizim atdığımız addım müdafiə məqsədli olub. Rusiyanın narahatlığını başa düşürük. Suriyada iki koalisiya döyüşməyə davam etdiyi müddətdə hava sahəsində qəzaların qarşısını almaq çətin olacaq. Ortada İŞİD hədəfi yox idi. Hava sahəmizi müdafiə etmək üçün günahlandırılmamalıyıq. Ümid edirəm, Rusiya Türkiyəyə qarşı tətbiq etdiyi sanksiyaları yenidən gözdən keçirər. Hava sahəsini qorumaq bizim vəzifəmizdir. Heç bir hökumət lideri vəzifəsini yerinə yetirdiyi üçün üzr istəməz. Ordumuz vəzifəsini yerinə yetirib. Heç bir ölkə bizdən üzr gözləməsin”.