Azərbaycan-Macarıstan əlaqələri strateji tərəfdaşlıq, dostluq və qarşılıqlı hörmətə əsaslanır və ildən-ilə genişlənməkdə davam edir. İki ölkə arasında ticarət dövriyyəsində 2024-cü ildə daha 29 faiz artım özünü göstərib.

Əmək və əhalinin sosial müdafiəsi nazirliyindən Qaziler.az-a bildirilib ki, bu barədə Azərbaycan və Macarıstan Hökumətləri arasında iqtisadi əməkdaşlıq üzrə Birgə Komissiyanın Azərbaycan tərəfindən həmsədri, əmək və əhalinin sosial müdafiəsi naziri Sahil Babayevlə Macarıstanın ölkəmizdəki fövqəladə və səlahiyyətli səfiri Tamaş Tormanın görüşündə bildirilib.

Azərbaycan və Macarıstan dövlət başçılarının siyasi iradəsi, səyləri ilə iki ölkə arasında əlaqələrin strateji tərəfdaşlıq səviyyəsinə yüksəldiyi vurğulanıb, müxtəlif sahələri əhatə edən əməkdaşlığın davamlı inkişafından məmnunluq ifadə olunub. 

İki ölkənin Hökumətləri arasında iqtisadi əməkdaşlıq üzrə Birgə Komissiyanın fəaliyyəti qeyd edilib. Komissiyanın keçən il Bakıda 10-cu iclasının keçirildiyi, növbəti iclasının bu il Macarıstanın paytaxtı Budapeştdə keçirilməsinin nəzərdə tutulduğu bildirilib. Habelə ötən dövrdə Bakı və Budapeştdə keçirilən biznes forumların və işgüzar görüşlərin, digər tədbirlərin əlaqələrimizn inkişafında önəmi diqqətə çatdırılıb. 

Görüşdə ikitərəfli əməkdaşlıq gündəliyi üzrə iqtisadi və ticarət, enerji, yaşıl enerjinin inkişafı və ötürülməsi, infrastruktur, nəqliyyat, kənd təsərrüfatı, təhsil, mədəniyyət, sosial, turizm və s. sahələrdə gələcək əməkdaşlıq məsələləri müzakirə olunub.