“Yanvarın 17-dən Azərbaycanda fəaliyyət göstərən MDB ölkələri missiyasına 169 nümayəndə daxildir”.
Apa xəbər verir ki, bunu jurnalistlərə açıqlamasında MDB Baş katibi Sergey Lebedev deyib.
“Biz bura xoşməramlı missiya ilə gəlmişik, çünki Azərbaycan Müstəqil Dövlətlər Birliyinin ayrılmaz hissəsidir və iqtisadi, humanitar əməkdaşlıq və digər məsələlərdə fəal iştirak edir. Biz hamımız sülhdə, MDB məkanında sabitlikdə maraqlıyıq”, - Baş katib bildirib.
Onun sözlərinə görə, müşahidəçi missiyasına MDB ölkələrindən olan parlamentarilər, MDB Parlamentlərarası Assambleyasının (PA) müşahidəçilər qrupu daxildir. “Bizim missiyaya parlamentarilərlə yanaşı, MDB ölkələrinin diplomatları, mərkəzi seçki komissiyalarının üzvləri və onların rəhbərləri, MDB İcraiyyə Komitəsinin əməkdaşları, seçki qanunvericiliyi üzrə ekspertlər daxildir”, - Lebedev vurğulayıb.
Baş katib Azərbaycanda keçirilən prezident seçkilərini müşahidə etmək üçün dəvətə görə təşəkkür edib.
“Bu növbədənkənar seçkilər məhz respublikadakı dəyişmiş şəraitlə, Azərbaycan Respublikasının bütün ərazisində prezident seçkilərinin keçirilməsi zərurətindən irəli gəlir”, - Sergey Lebedev vurğulayıb.
MDB baş katibi həmçinin bildirib ki, 8 nəfərdən ibarət kiçik müşahidəçilər qrupu Azərbaycan Respublikasının bir çox rayonlarına səfər edib, orada səsvermə prosesini müşahidə ediblər.
Bakıda bir sıra seçki məntəqələrində olar Lebedev deyib ki, səsvermə insanların böyük fəallığı ilə keçirilir: “Seçkilərdən əvvəl çox böyük hazırlıq işləri aparılıb. Son iki ayda MSK və dairə seçki komissiyaları həm Bakıda, həm də regionlarda prosesin bütün iştirakçıları üçün treninqlər təşkil ediblər. İnsanlara seçicilərlə necə davranmaq, səsvermənin gedişini necə izləmək öyrədilib. Bu iş hədər getmədi, bunu bütün seçki məntəqələrində aydın şəkildə təşkil olunmuş səsvermə sübut edir. Qərb müşahidəçilərinin bir neçə il əvvəl verdiyi tövsiyələrə görə, bir çox seçki məntəqələrində videomüşahidə sistemləri quraşdırılıb, üstəlik, girişdə seçicilər “görünməz mürəkkəblə” qeydə alınır. Bu, bəzi yenidən səs verməsinin qarşısını almağa kömək edir. Biz hələ ölkəyə gəlməmişdən Azərbaycan Respublikasının seçki qanunvericiliyini təhlil etməyə başlamışıq və Azərbaycanın Seçki Məcəlləsinə bəzi müsbət dəyişikliklərin edildiyini görmüşük. Biz namizədlərin irəli sürülməsi, onların qeydə alınması prosesini təhlil etdik və seçkilərin müsabiqə əsasında, yeddi namizədin iştirak etdiyi faktını qeydə aldıq. Namizədlərin tərcümeyi-hallarının təhlili göstərir ki, bunlar hamısı sanballı, bir-iki ali təhsilli, müəyyən təcrübəyə malik insanlardır ki, bu da seçki kampaniyasında iştirak etmək üçün mühüm əhəmiyyət kəsb edir. Bütün namizədlərə bərabər imkanlar verilib”.
MDB Baş katibinin sözlərinə görə, bütün namizədlərə bərabər imkanlar verilib: “ATƏT, ŞƏT, TDT-dən xeyli sayda beynəlxalq müşahidəçinin gəlməsi onu göstərir ki, Azərbaycanda seçkilərə çox böyük maraq var. Biz həqiqətən ümid edirik ki, təkcə MDB ölkələrindən olan müşahidəçilər deyil, digərləri də Azərbaycanda keçirilən seçkilərə obyektiv qiymət verəcəklər”.
