Ukrayna prezidenti Vladimir Zelenski amerikalı həmkarı Co Baydenə “qələbə” arzulayıb və onu ad günü münasibətilə təbrik edib.

Qaziler.az bu barədə “Nyus.ru”ya istinadla xəbər verir.

Bildirilib ki, Zelenski təbrik mesajını Kiyevə gələn Pentaqon rəhbəri Lloyd Ostin vasitəsilə çatdırıb. Bununla bağlı Ukrayna lideri öz teleqram kanalında müvafiq video fraqment də paylaşıb.

“Biz prezident Baydenə çox minnətdarıq. Prezidentə ad günü münasibətilə ən xoş arzularımızı çatdırın. Biz ona qələbə arzulayırıq, sonrasına özü qərar verəcək”, – Zelenski qeyd edib.

Eyni zamanda, dövlət başçısı əlavə edib ki, Ukrayna ABŞ-ın uzunmüddətli dəstəyinə ümid edir. Ostin öz növbəsində qeyd edib ki, Vaşinqtonun həqiqətən də müvafiq niyyətləri var.

Məlumdur ki, Co Bayden noyabrın 20-də 81 yaşını qeyd edir. Gözlənilir ki, dövlət başçısı yenidən Demokratlar Partiyasından prezidentlik yarışında iştirak edəcək. Səsvermə isə 2024-cü ilin noyabrında keçiriləcək.

Qeyd edək ki, ABŞ-ın müdafiə naziri noyabrın 20-də Kiyevə gəlib.

QAZİLER.AZ