Azərbaycan İslam Əməkdaşlıq Təşkilatının (İƏT) mühüm tədbirinə - Təşkilata üzv ölkələrin əmək nazirlərinin V konfransına ev sahibliyi etməyə hazırlaşır.

Əmək və Əhalinin Sosial Müdafiəsi Nazirliyindən Qaziler.az-a bildirilib ki, İƏT-ə üzv ölkələrin əmək nazirlərinin V konfransı 21-23 noyabr 2023-cü il tarixlərində Bakı Konqres Mərkəzində keçiriləcək.

İƏT-ə üzv ölkələr arasında əmək, məşğulluq və sosial müdafiə sahələrində əməkdaşlığın genişləndirilməsi və birgə səylərin gücləndirilməsində İƏT-ə üzv dövlətlərin əmək nazirlərinin konfransları xüsusi əhəmiyyət kəsb edir.

Bakıda keçiriləcək növbəti konfrans da bu məqsədə xidmət edəcək.

Konfrans Təşkilata üzv ölkələrin sosial sahənin, o cümlədən əmək bazarının inkişaf etdirilməsi, məşğulluq, işsizliyin aradan qaldırılması, yoxsulluğun azaldılması, əmək miqrasiyası, işçi qüvvəsinin təkmilləşdirlməsi kimi hər bir ölkə üçün vacib sosial məsələlərin həlli istiqamətində qarşılıqlı faydalı əlaqələrin genişlənməsinə öz dəyərli töhfəsini verəcək.