Hazırda 705 olan Avropa Parlamentinin deputatlarının sayının 2024-cü ilin iyununda keçiriləcək seçkilərdən sonra 720-yə yüksələcəyi açıqlanıb.

Bildirilib ki, Avropa İttifaqına (Aİ) üzv dövlətlərin nümayəndələrindən ibarət Aİ Şurasının səfirlər səviyyəsində keçirilən iclasında 2024-2029-cu illər üçün deputatların sayının artırılması ilə bağlı konsensus əldə olunub.

Qaziler.az Türkiyə KİV-nə istinadla xəbər verir ki, bəzi Aİ ölkələrinin media qurumları toplantının sənədlərinə istinad edərək, onların sayının 720-yə yüksələcəyini yazıb. Avropa Parlamentinin (AP) deputatlarının iyunda parlamentdəki yerlərin sayını 716-ya çatdırmağa razılaşdıqları açıqlanmışdı.

Son konsensusla parlamentdə təmsil olunan 27 Aİ ölkəsindən 12-nin deputatlarının sayı artacaq. Bunlardan Fransa, İspaniya və Hollandiya hər biri AP-yə daha 2 deputat göndərəcək.

Avstriya, Belçika, Polşa, Sloveniya, Slovakiya, Finlandiya, Latviya, İrlandiya və Danimarkadan daha bir nəfər Avropa Parlamentinin deputatı seçiləcək.

Xatırladaq ki, AP-nin 5 illik səlahiyyət müddəti üçün seçkilər 6-9 iyun 2024-cü il tarixlərində keçiriləcək.

QAZİLER.AZ