Azərbaycan Xarici İşlər Nazirliyi Beynəlxalq Ədalət Məhkəməsinin Ermənistanın tələbinin yekdilliklə rədd edilməsinə dair 6 iyul 2023-cü il tarixli qərarının rəsmi İrəvan tərəfindən təhrif olunması məsələsini şərh edib. 

Qurumdan bildirilib ki, Beynəlxalq Ədalət Məhkəməsinin 11 iyul 2023-cü il tarixində dərc edilmiş 6 iyul 2023-cü il tarixli qərarında qeyd edildiyi kimi, məhkəmə İrqi Ayrı-seçkiliyin Bütün Formalarının Ləğv Edilməsi üzrə Beynəlxalq Konvensiyanın tətbiqi ilə bağlı Ermənistan Azərbaycana qarşı məhkəmə işi üzrə 22 fevral 2023-cü il tarixli Qərarında dəyişiklik edilməsi məqsədilə Ermənistanın 12 may 2023-cü il tarixli tələbini yekdilliklə rədd edib:

“Beləliklə, məhkəmə qərarı ilə bir daha təsdiq etdi ki, “23 aprel 2023-cü il tarixindən etibarən Laçın dəhlizində və ya onun boyunca yerləşdirilən hər hansı bir və bütün şəxsi heyəti geri çəkməyi və belə şəxsi heyətin Laçın dəhlizi üzərində və ya Laçın dəhlizi boyu yerləşdirilməsindən çəkinməyi Azərbaycandan tələb edən əlavə müvəqqəti tədbiri daxil etməklə” 22 fevral 2023-cü il tarixli Qərara dəyişiklik etmək barədə Ermənistanın tələbi əsassızdır.

Ermənistanın yalanlarının əksinə, Beynəlxalq Ədalət Məhkəməsi nəzarət-buraxılış məntəqəsinin Laçın yolu boyunca hərəkətə mane olduğunu və Azərbaycanın 22 Fevral Qərarını pozduğunu müəyyən etməyib.

Ermənistanı tərəflərin mübahisəsini daha da gərginləşdirə biləcək hər hansı hərəkətdən çəkinmək barədə məhkəmənin Qərarına əməl etməyə və “Laçın” sərhəd-buraxılış məntəqəsinin fəaliyyətinə maneə törədən davranışa son qoymağa çağırırıq”.

01:13

“İyulun 6-da Beynəlxalq Ədalət Məhkəməsi Ermənistanın Məhkəmənin 22 fevral 2023-cü il tarixli qərarına dəyişiklik edilməsi barədə müraciətini haqlı olaraq rədd edib”.

Bunu Azərbaycan xarici işlər nazirinin müavini Elnur Məmmədov “Twitter”də bildirib.

Diplomat daha sonra qeyd edib:

“Məhkəmə yekdilliklə Ermənistanın Azərbaycandan Laçın sərhəd keçid məntəqəsində xidmət edən Dövlət Sərhəd Xidməti əməkdaşlarını geri çağırmaq barədə iddiasını təmin etməkdən imtina edib.

Ermənistanın yalan bəyanatlarının əksinə olaraq, Beynəlxalq Ədalət Məhkəməsi nəzarət-buraxılış məntəqəsinin nə Laçın yolu ilə hərəkətə mane olduğunu, nə də Azərbaycanın 22 fevral Qərarını pozduğunu müəyyən etməmişdir.

Biz Ermənistanı tərəflərin mübahisəsini gərginləşdirə biləcək hər hansı hərəkətdən çəkinmək və nəzarət-buraxılış məntəqəsinin fəaliyyətinə mane olan qeyri-kostruktiv davranışına son qoymaq barədə Məhkəmənin qərarına əməl etməyə çağırırıq”.