"İranın dini lideri Əli Xameneyinin müşaviri Kamal Xərrazi Tehranda keçirilən dialoq forumunda deyib ki, ölkəsinin nüvə bombası istehsal etmək imkanı var, ancaq istehsal etmək fikrində deyil. Ancaq onun sonrakı cümləsi ilk fkrini təkzib mahiyyətlidir: “Nüvə texnologiyasına sahib olmaq çəkindiricidir”. Yəni İranın nüvə silahı olsa heç bir dövlət Tehrana təzyiq edə bilməyəcək".

Qaziler.az xəbər verir ki, bu fikirləri "Atlas" Araşdırmalar Mərkəzinin rəhbəri Elxan Şahinoğlu səsləndirib. O, İran nüvə silahına yiyələnərsə, bundan hansı ölkələrin ehtiyat edəcəyini bu cür izah edib:

"İstanbulda ötən həftə bölgədəki vəziyyətlə bağlı iki günlük konfransda iştirak etdim. Müxtəlif mövzuları müzakirə etdikdən sonra konfrans iştirakçılarına belə bir sualı verdim: “İran bir gün nüvə silahı əldə etdiyini açıqlayarsa (bu istisna deyil), Türkiyə və Azərbaycan hansı addımları atacaq?”. Məsələ burasındadır ki, İranın nüvə silahına yiyələnə biləcəyindən ehtiyat edən əsas ölkələr bunlardır: İsrail, ABŞ və Səudiyyə Ərəbistanı. Ancaq Azərbaycanın da İranla münasibətlərində gərginlik hökm sürür.

Fikrimcə, İran nüvə silahı əldə edərsə Türkiyə də nüvə silahına yiyələnmək barədə ciddi düşünmək məcburiyyətində qalacaq. Çünki ətrafda bir qisim dövlətin – Hindistan, Pakistan, Rusiya, Çin, İsrail və İran da bu sıraya qatılarsa Türkiyə və Səudiyyə Ərəbistanı da oxşar çalışmalara başlayacaq. İranın nüvə silahına yiyələnməsi Azərbaycanın maraqlarına da ziddir. Ancaq aydındır ki, nüvə silahına yiyələnmək kimi planımız yoxdur. Buna baxmayaraq, İran nüvə silahı əldə edərsə təhlükəsizlik təminatımızın artırılması barədə ciddi düşünməli olacağıq".

QAZİLER.AZ