İsveç və Finlandiya azərbaycanlılarından AŞPA-nın Ermənistan üzrə həmməruzəçilərinə çağırış

İsveç və Finlandiya azərbaycanlılarından AŞPA-nın Ermənistan üzrə həmməruzəçilərinə  çağırış backend

İsveç və Finlandiyada yaşayan Azərbaycan icmasının üzvləri Avropa Şurası Parlament Assosiasiyasının (AŞPA) Ermənistan üzrə həmməruzəçilərinə - isveçli deputat Boriana Oberginə və finlandiyalı deputat Kimmo Kilyunenə müraciət ediblər.

Diasporla İş üzrə Dövlət Komitəsindən Qaziler.az-a bildiriblər ki, müraciəti İsveçdə Azərbaycanlı Akademiklər Assosiasiyasının sədri Səadət Kərimi, İsveç-Azərbaycan Mədəniyyət Dərnəyinin (SAF) sədri Sevda Dadaşova və Helsinki Azərbaycan Evinin rəhbəri, “Azər-Türk” Gənclər Təşkilatının sədri, Skadinaviya Azərbaycanlıları Koordinasiya Şurasının Finlandiya üzrə əlaqələndiricisi Ülviyyə Cabbarova imzalayıblar.

Müraciətdə bildirilib ki, AŞPA-nın Ermənistan üzrə həmməruzəçilərinin Azərbaycan Silahlı Qüvvələri ilə bağlı qərəzli bəyanatı İsveç və Finlandiya azərbaycanlılarında dərin narahatlıq doğurub. İsveç və Finlandiya azərbaycanlılarının öz deputatlarından faktlara və hadisələrə neytral və obyektiv yanaşma tələb etdiyi diqqətə çatdırılıb.

Qeyd edilib ki, bu günlərdə dünya azərbaycanlıları 2020-ci il sentyabrın 27-dən noyabrın 10-dək Ermənistan silahlı qüvvələrinin Azərbaycan şəhərlərinə raket hücumları nəticəsində həlak olanların xatirəsini ehtiramla yad edirlər.

“İnsanlığa və sülhə qarşı törədilmiş bu cinayətləri pisləyirik. Bu qanlı cinayətlərin törədilməsinə məsuliyyət daşıyanların indiyədək ədalət məhkəməsi qarşısına çıxarılmamasından dərin təəssüf hissi keçiririk”, - deyə vurğulanıb.

Bəyanatda Qarabağ münaqişəsinin tarixi, Ermənistanın 30 illik işğal dövründə törətdiyi dəhşətli müharibə cinayətləri, o cümlədən İkinci Qarabağ müharibəsi dövründə münaqişə zonasından və cəbhə xəttindən onlarla kilometr aralıda yerləşən Azərbaycanın Gəncə, Naftalan, Bərdə, Tərtər, Mingəçevir və digər şəhərlərinin ağır artilleriya, ballistik raketlər, fosforlu və kasetli bombalar vasitəsilə bombardman edildiyi bir daha diqqətə çatdırılıb: “Nəticədə 2020-ci il sentyabrın 27-dən noyabrın 10-dək Ermənistanın hərbi təcavüzü nəticəsində 12-si uşaq, 27-si qadın olmaqla 93 mülki şəxs həlak olub, 454-ü müxtəlif dərəcəli bədən xəsarətləri alıb, mülki infrastruktura ciddi ziyan dəyib”.

Ermənistanın hərbi cinayətlərini beynəlxalq hüququn norma və prinsiplərinin, 1949-cu il Cenevrə Konvensiyalarının və onlara Əlavə Protokolların müddəalarının kobudcasına pozulması kimi qiymətləndirən diaspor təşkilatlarının rəhbərləri bildiriblər ki, dünya azərbaycanlıları AŞPA-ya bəslədikləri ümidlərini çoxdan itiriblər. Çünki AŞPA-da bu dəhşətli hadisələrə adekvat reaksiya vermək əvəzinə, müxtəlif dövrlərdə siyasi sifarişlərin yerinə yetirilməsi üçün dəfələrlə Azərbaycan hədəf seçilir, “...ölkəmiz haqqında yalanlar uydurulur və yayılır. Azərbaycanda gedən müsbət proseslər isə təəssüf ki, qeydə alınmır”.

Müraciət müəllifləri AŞPA-nı daha obyektiv və neytral yanaşma nümayiş etdirməyə, işğalçı Ermənistandan Azərbaycana qarşı törətdiyi hərbi cinayətlərə görə cavab tələb etməyə və Azərbaycanla sülh müqaviləsi imzalaması üçün rəsmi İrəvana təzyiqlər göstərməyə çağırıblar.

loading...
Diaspora