Xaricdə Azərbaycan evlərinin açılması soydaşlarımızın birgə fəaliyyəti, şəbəkələşməsi, azərbaycançılıq ideologiyası ətrafında sıx birləşməsi baxımından böyük əhəmiyyət kəsb edir.
Bu səbəbdən dünyanın müxtəlif ölkələrində fəaliyyət göstərən Azərbaycan evlərinin sayı ilbəil artmaqdadır.
Budapeştdə fəaliyyət göstərən Azərbaycan Evi 2019-cu il dekabrın 27-də Diasporla İş üzrə Dövlət Komitəsinin dəstəyi ilə açılıb. Zəngin mədəni ənənələrə və çoxəsirlik tarixə malik olan Azərbaycanı xaricdə layiqincə təmsil etmək üçün Budapeşt və ətraf şəhərlərdə yaşayan soydaşlarımız mütəmadi olaraq bu evdə toplaşır, Vətənə dəstək nümayiş etdirir, ölkəmizi xaricilərə tanıdırlar.
Macarıstanda yaşayan həmvətənlərimizin görüş yeri olan Azərbaycan Evində toplaşan gənclər asudə vaxtlarında müxtəlif intellektual oyunlar oynayır, musiqi alətlərində ifa edirlər. Bununla yanaşı, Azərbaycan Evində rəsm, rəqs və musiqi dərnəkləri də təşkil edilib. 2022-ci ildən etibarən isə Azərbaycan və macar dillərinin tədrisinə start veriləcək.
